సత్యాన్వేషణ
ఏదోలా , నా జీవితం హాయిగా గడిచిపోతే చాలు!
ఏదోలా, నా
పిల్లల జీవితమూ సౌఖ్యoతో వెళ్ళిపోతే చాలు!
ఏదోలా, నా
మనుమల జీవితమూ బంగారంలా వెళ్ళిపోతే చాలు!
ఏదోలా, నా
వంశమంతా సుఖసంతోషాలతో వర్ధిల్లితే అది చాలు!
అంతే!!
________________*****************__________
మిగతా
సమాజమంతా ఎలాపోతే, నా
కేంటి?
మిగతా జనులంతా ఏ బాధలు పడితే, నా
కేమి?
మిగతా
ప్రజలు ఏ దౌర్జన్యానికి బలైపోతే , నా
కెందుకు?
_________*******________
చాలామంది
దోపిడీ పదఘట్టన క్రింద
నలిగిపోతున్నారంట !
ఐతే ఏమి? నా
కేం కాలేదుగా, అందుకే
దాని గురించి ఆలోచించను !
నిజం చెప్పాలంటే
ఆ 'దోపిడీ' ఏంటో---
నాకు సరిగా అర్థం కాదు
అర్థం కాని దాని గురించి ......
ఆలోచించడం ఎందుకు? అందుకే,
అటువైపు ఆలోచనలను కదలనివ్వను!
మరొక వైపు ,
మతమో, కులమో,
"ప్రాంతమో--------------"
మరొక రాజకీయ రాకాసి నీడో ---
మరికొందరి బ్రతుకుల వెలుగులను
చీకటమయం చేస్తున్నాయంట
అయితే ఏమి?
ఆ చీకటి -
నా జీవిత వెలుగును శాసించలేదు !
అందుకే, నేను, ఆ
గొడవల గురించి అసలు పట్టించుకోను!
----------********----------
ఇక నాగురించి,
నేను --
నా వ్యక్తిగత విజయాన్ని
ఎంతో కష్టించి , ఎంతో కష్టించి,
సొంత ప్రతిభతో సాదించుకున్నాను !
నేను,
మీ బాధల గురించి ఆలోచించి వుండి వుంటే --
నా సమయం ఎంతో వృధా అయ్యి వుండేది !
అందుకే ఆలోచించలేదు !
దీన్ని స్వార్ధం అంటారా?!
అనుకోండి! నేను లెక్క చేయను!
------******--------
నేను కోరుకొనేది.......
ఏంతో ప్రశాంతమైన జీవితాన్ని!
అది నాకు ఈ సమాజంలో దొరుకుతోంది !
కాకపోతే ....
మొదట్లో ....
ఆస్థులు కూడబెట్టడానికి,
ధనాన్ని రాశిగా చేయడానికి ---
కొంత కష్టపడాల్సి వచ్చింది! నిజమే ,
నా మిత్రులు కొందరు,
ఆ కష్టం కూడా చెయ్యకుండానే,
తరతరాల వారసత్వపు భూములను , ఆస్థులను ,
సొంత ఆస్థి అనే హక్కుతో ,
మేం యజమానులం అనే అజమాయిషితో---
సౌందర్యవంతంగా--
అనుభవించేస్తున్నారు! అదృష్టవంతులు వాళ్ళు!
వాళ్ళను చూస్తే కొంచం జెలసీ నాకు!
------******-------
సరే--
బుద్ధిపుడితే, అపుడపుడూ -
నేనూ కొన్ని దానాలు ధర్మాలు కూడా చేస్తాను!
దాని ద్వారా నాకు బోల్డంత కీర్తి!
ఈ సమాజం నన్నో పెద్దమనిషిగా గుర్తించి గౌరవిస్తుంది !
(ఎన్నో అవార్డులు, రివార్డులు కూడా ఇస్తుంది )
మరి అటువంటి ఈ సమాజం ,
సరిగా లేదు , తలక్రిందులుగా వుందంటే నాకు కోపం రాదూ !???
ఎవడెలా పొతే, నా
కేంటి?
నా,
బ్రతుకు బాగుగానే వుంది !
మీ గొడవలు , బాధలు నన్ను ప్రభావితం చేయడం లేదే?! చెయ్యవు కూడా !
మీకో విషయం తెలుసా ?
అసలు, నే నవేవీ పట్టించుకోను !నా
చూపు అసలటు వైపు వెళ్ళదు !
అందుకే, నే
నెంతో హాయిగా బ్రతుకుతాను !
సుఖ సంతోషాలతో , సౌఖ్యంతో --
జీవితాన్ని గడుపుతాను!
-----*****--------
మరి మీరేమో
కొందరు, విప్లవం, వర్గపోరాటం, భూమిపోరాటం ,
మార్క్సిజం , దళిత, స్త్రీ వాదాలంటూ ---
వెర్రి వేషాలతో బ్రతుకును
గందరగోళ పరుచుకుంటారు !
ఎందుకో నాకర్ధం కాదు !
నా
కవన్నీ అనవసరం !
------******-------
అందుకే
ఏదోలా, నా
జీవితం, నా
పిల్లల జీవితం , నా
మనుమల జీవితం , నా
వంశమంతా కూడా ....
సుఖసంతోషాలతో --
హాయిగా ----
వర్ధిల్లాలని ,
ఆ పరమాత్ముణ్ణి కోరుకుంటాను !
-------*****-------
దేనికైనా పెట్టిపుట్టాలి కదా ,
సుఖంగా బ్రతకటానికి --
నేను పెట్టిపుట్టాను !
ఇది నా ప్రారబ్ధం !
కష్టాల్లో మగ్గడం ,
చాకిరీ చెయ్యడం ,
అర్థాకలితో మాడడం --
మీ ప్రారబ్ధమేమో !
ఇంత చిన్న విషయం ఎందుకు అర్థం చేసుకోరు ?
అయినా, నిరంతరం మేము,
మీకు భక్తి బోధనలు చేస్తూనే వున్నామే !
ఆద్యాత్మిక చింతనను కల్గిస్తూనే వున్నామే !
అందుకే మనసు పెట్టి ,
ఇకనైనా "విషయాన్ని" అర్థం చేసుకుని ,
శాంతంగా , బుద్దిగా మసులుకోండి !
------*****-------
మీరు కూడా మిగతా గొడవలు మానేసి ,
సొంత జీవితం పై శ్రద్ధ పెడితే --
నాలా పైకొస్తారు! సుఖపడ తారు !
ఎవడెలా పొతే , మీ
కెందుకండి?
ఎదుటివ్యక్తి పడే బాధ , మీ
శరీరానిది కాదు !
అందుకే స్పందన అనవసరం
క్షతగాత్రుడివి నీవు కానప్పుడు
మౌనంగా ఉండడమే గొప్ప వివేకం!
మీ శరీరానికి గాయం అయితే ,
నొప్పి తెలుస్తుంది ! కనుక ,
అప్పుడు పడే బాధకు అర్థం వుంది !
మిగతా అర్థం లేని స్పందనలన్నీ
సమయాన్ని వృధా పరిచేవే!!
----------*****--------
మీ గురించి మీరు ఆలోచించుకోండి !
"సమాజం బాగోలేదు
దీన్ని బాగుచేద్దాం " అని
బయల్దేరడం శుద్ధ దండుగ !
-------*****---------
నేను
చెప్పాల్సింది చెప్పాను!
తర్వాత మీ ఇష్టం
శ్రీనివాస రాజు .పి
--14-02-1996
Cell No :- 810 6871 802
